Ang biktima kinsa daling nadala sa usa ka pribadong tambalanan sa dakbayan sa Sugbo giilang si Antonio Cuizon, hingkod ang panuigon ug molupyo sa North Poblacion, Naga .
Si Cuizon maoy giingong presidente sa Panaghugpong sa mga Mamumuo sa Atlas(PAMA) nga usa ka paksyon sa mga unyon sa mga mamumuo diha sa maong gipasirad-ang minahan.
Sumala pa sa imbestigasyon ni SPO1 Rogeli Rentellesa ang pagpamanhig nahitabo diha sa Sitio Gawaygaway barangay Uling, Naga alas 9 pasado sa buntag samtang ang biktima uban sa mga kabanay ug mga bata padulong sa dakbayan sa Toledo.
Sigun pa sa taho nga duha ka mga lalaking nagpurong og panapton sa ulo ang kalit nga miabay sa gisakyang kotse ni Cuizon ug kalit gipusil duha ka higayon ginamit ang usa ka armalite.
Gikatahong wala makausab og tira ang mga suspek dihang nahagbong kalit ang magazine sa armas ug kalit usab nga mikagar ang makina sa motorsiklo nila maong daling nakasutoy ang awto sa biktima padulong sa Jaclupan ug lahos sa dakbayan sa Sugbo.
Ang biktima giingong nakaangkon og tulo ka samad pinusilan sa abaga,liog ug bukton apan luwas na sa peligro ang kinabuhi niini.
Sumala pa sa mga saksi nga gikahinabi sa mga tigbalita nga alas 8 pa sa buntag dunay namatikdang upat ka tawo nga nagpaabot sa maong lugar ug dihang nangagi ang gisakyan sa biktima kalit nilang gigukod ug gibanhigan.
Matud pa sa kapolisan nga natagak ang magazine sa armalite maong wala na makapadayon sa pagpaarak ang mga namanhig apan dihang moarangkada na unta pagbalik aron gukdon ang awto giingong mikagar ang motorsiklo maong namalik na lang sa agi ang mga suspek.
Sumala pa sa kapolisan gireklamo niadtong milabay'ng semana sa usa ka lider usab sa laing paksyon sa unyon sa Atlas si Cuizon kay giingong hubog kini nga nanghasi diha sa ilang bunkhouse.