Negosyante mibulgar sa anomaliya sa business permit

Gibulgar sa usa ka nanag-iya og establisamento nga gipasirad-an ni MayorTomas Osmeña gumikan sa pagbaton og peke nga business permit ang halapad nga anomaliya sulod sa buhatan sa City Hall ilabi na gyud sa buhatan sa Business Permit Section sa Treasurer's Office.

Sa giduso nga affidavit ni Ofelia Alcordo tagdumala sa Cebu Security Agency nga nahimutang sa dalan B. Rodriquez ning dakbayan ngadto ni Osmeña kagahapon gitug-an niini nga kumpleto ang iyang nabayran alang sa paglukat og bussiness permit niadtong bulan sa Enero ning tuiga.

Iyang gibutyag nga ang iyang kanhi staff nga si Nida Dina Benolirao maoy iyang gisugo sa pag-asikaso sa City hall sa pag-renew sa ilang permit hinungdan nga nakabayad gyud siya ug P7,875 sa petsa 20 sa Enero apan pagkahapon sa mao gihapong adlaw gipangayoan na sab siya og P25 mil nga matud sa iyang staff normal nga pangayuon sa taga City Hall aron mapadali ang pag-release sa maong permit.

Iyang gibutyag nga miabot ngadto sa P32,875 ang iyang tanang nabayran sa pag-renew sa iyang permit hinungdan nga pagkahapon sa maong adlaw nakuha dayon niya ang permit gumikan kay matud sa iyang staff duna kini suod nga higala diha sa City Treasurer's Office apan wala motug-an sa ngalan niini.

Apan matud ni Alcordo iyang gi-terminate si Benolirao niadtong Hulyo 8, gumikan sa nadiskobrihan nga mga anomalosong transaksyon niini sa ilang opisina.

Gumikan sa maong pagsumbong ni Alcordo nakumbinsir si Osmeña nga paablihan og balik ang maong Security Agency human usab kini makabayad og multa nga moabot ang tanan og P166,501.80 apil na ang pagbayad og buhis sa sister company niini ang Raw Human Resources nga tupad ra og opisina.

Ang maong establisamento kauban kini sa lain pang duha ka mga establisamento nga gipasirad-an sa mga sakop sa Revenue Task Force niadtong miaging adlaw.

Samtang naka-abli na sab og balik sugod kagahapon sa buntag ang RB Car Trade sa may Salvador Labangon nga gipanag-iya ni Rafael Burgos human kini mobayad sa ilang obligasyon ug mipasalig nga moduso og affidavit gumikan kay nabiktima usab sila sa nalutsan og peke nga business permit.