Tomboy gi-rape sa wa pa patya: Suspek naghikog, patay human nakonsensiya sa iyang nabuhat

Usa sa ka tomboy gipatay human kini lugosa ug gibulit og samad dinunggaban sa liog ug kalawasan nakaplagan sa kalibunan. Samtang usa ka adlaw human madiskubrihe ang lawas sa babaye nakaplagan usab ang suspek nga nagbitay sa ilang balay.

Ang biktima giilang si Glorence Glysa Tapia,19, molupyo sa Sitio Lakaron Barangay Pitalo lungsod sa San Fernando nga nakit-ang wala nay kinabuhi ug abli na ang karsones niini.

Samtang ang suspek nga si Glenn Escabas, 23, ulitawo ug nagpuyo diha sa Sitio Mojon Barangay Langtad lungsod sa Naga kinsa nakonsensiya nakit-an na lang sa iyang inahan ug mga igsuon nga nagbitay sa nylon nga pisi nga gihikot sa iyang liog, kagahapon sa buntag.

Sumala pa ni PO1 Tiburcio Baranggan nga gikahinabi sa Banat News nga nalugos gyud ang biktima base usab sa pakisusi sa Scene of the Crime Operations (SOCO-7), gawas pa niana gibana-banang kapin 20 ka samad dinunggaban ang nahiaguman niini gumikan usab sa pagsukol niini kang Escabas.

Ang biktima gikan pa sa diskohan uban sa iyang higala nga si Joy Mae Abaquita, hingkod ang panuigon ug silingan sa suspek namauli na human gihatod si Abaquita, si Tapia nag-inusara na kining miuli sa ila.

Matud pa ni PO1 Baranggan nga nasugatan sa suspek si Tapia diha sa dalan ug maoy gipahimungtan. Sa gihimong imbestigasyon sa sayo pa si Escabas gikatahong namunlot og babaye diha sa diskohan apan nakadagan ang maong dalaga palayo. Dugang pa niini duna pay laing mga tawo nga gipangtukmod ang suspek una pa kini mipauli sa ilang balay, giisip ni Baranggan nga dunay kuhaon ang suspek.

Dihang mibalik na si Escabas sa diskohan gituohang diha na mahitabo nga nagkasugat sila ni Tapia ug gihimo na ang krimen. Dugang pa sa polis nga misukol gyud ang biktima sanglit nagdala-dala man kini kanunay og batangas maong gipatay na lang kini.

Nasuta usab nga si Escabas dunay mga samad kinawrasan sa iyang liog ug hiwa sa bukton nga gituohang binuhatan ni Tapia sa pagsukol. Dunay "suicide note" nga gibilin si Escabas ngadto sa iyang ginikanan nga nangayog pasaylo sa nahimo nga nag-ingon.

"Pa, Ma, sorry sa tanang mga sala nako hinaut nga magmalinawon namo dinhi sa akong paghawa. Ipangayo lang ko og sorry ni Joyjoy ug Manang Holly, nakunsensya nako. Ma, Pa wa nako 'to tuyoa pagdunggab ni Gly."

Si Baranggan nakumbinser nga sulbad na ang kaso sanglit mismong ang mga igsuon ug ginikanan ni Escabas gikatahong mikompirmar nga suwat kinamot sa suspek ang agi.