Turko gikilkilan og P15,000 cash

Usa ka Indian nga tigpautang ang gisignit ug gikilkilan sa mga nagpailang sakop sa Bureau of Immigration and Deportation niadtong nakalabay'ng adlaw diha sa dalan B.Rodriguez barangay Sambag Uno ning dakbayan nga luwan sa usa ka gray nga pick-up .

Unang nataho nga dunay usa ka "bombay" nga gisignit diha sa maong lugar apan ang kapolisan wala makakuha og kumpletong detalye kalabot sa insidente sanglit bisan sa gihimong paglibot-libot sa mga polis sa dakbayan walay nasugatang susamang sakyanan ug ingon man walay reklamante nga mianha sa buhatan sa mga polis hangtud pagka-alas 6:30 na sa gabii.

Si Baluir Singh,48, minyo ug molupyo sa barangay Pardo ning dakbayan midangop sa buhatan ni Criminal Intelligence and Investigation Branch Supt. Pablo Labra ug mitug-an sa insidente .

Si Labra sa pakighinabi sa Banat News nagkanayon nga subay sa alegasyon sa biktima upat ka mga wala mailhing mga lalaki nga luwan sa usa ka pick-up Mitsubishi Estrada nga abuhon ang kolor ug may plakang YAR-759 ang kalit nga mibabag sa iyang agianan samtang siya luwan sa iyang motorsiklo niadtong Biyernes sa alas 11 sa buntag sa maong dapit.

Ang duha niini gikatahong armado og kalibre 45 nga pistola mikanaog sa pick-up ug pugsanong mipasakay kaniya sa ilang sakyanan, sumala pa ni Singh nga gilibot-libot siya niini sa siyudad ug gidala sa usa ka hotel.

Matud pa ni Labra nga nagpaila kaniya ang upat nga sila mga sakop sa BID, apan nakugang nalang siya diha midemanda ang mga suspek og P100,000 kaniya, si Singh kinsa bag-uhay pa nanukot sa mga gipautang mihatag nalang sa iyang P15, 000 ngadto sa mga suspek dihang iyang gihangyo gumikan kay wala gyud siyay P100,000 nga ikahatag.

Human sa pagpangayo gikatahong gibiyaan siya sa mga suspek ug siya miadto usab ngadto sa CIIB.

Si Labra nagtuo nga gigamit lang sa mga suspek ang pangalan sa BID aron mangilkil apan iyang gibutyag nga makigkita siya sa mga kadagkuan sa BID aron maklaro ang tanan.

"Murag gigamit ra ning pangalan sa BID, but I will ask him again in the office para makahimo ta og cartographic sketch," asoy pa ni Labra.

Samtang karong adlawa gikatakdang makigkita si Singh ngadto kang Labra aron libuton ang tanang mga hotel ug mga pension houses dinhi sa dakbayan aron mamay-ungan sa biktima.