Lolo nga mipahimangno sa apo gitubag hinuon og tigbas

Samad tinigbasan sa iyang kalawasan ug bukton sa usa ka 65 anyos nga lolo nga maoy gitubag sa iyang apo sa dihang gitambagan pagpangita og trabaho ug pagtabang kaniya sa mga gimbuhaton sa panimalay.

Ang biktima nga milandig sa tambalanan giilang si Ireneo Dijan,minyo ug molupyo sa Sitio Napo, Barangay Sapangdaku ning dakbayan sa Sugbo.

Gipangita karon sa kapolisan ang suspek nga si Christopher Cabales, 27, ulitawo lumad nga taga Villahermosa Negros Oriental ug kasamtangang nagpuyo sa balay sa biktima.

Sumala pa nga gitambagan sa biktima ang suspek sa pagtabang kaniya sa mga gimbuhaton sa umahan o ba kaha mangita kini og trabaho apan wala madawat sa suspek ang tambag sa biktima dali kining mikuha og sundang dayong tigbas sa biktima makadaghang higayon.

Dugang pa niini dunay dili kumpirmadong report nga dunay anak ang suspek sa uyab niini ug diha gipapuyo sa suspek sa balay sa biktima.

Daling gidala sa mga silingan ang biktima sa tambalanan samtang mikaratel usab og ikyas ang suspek ug wala na hikit-i sa kapolisan.