Si Supt. Vicente Loot sa pakighinabi sa Banat News kagahapon mitug-an nga human sila makadawat og mensahe gikan sa Police Regional Office 7 kalabot sa insidente gimanduan na niya ang kapolisan sa iyang hurisdiksyon sa pagpahigayon og dugang pagpatrolya ilabi na duol sa mga cellsites dinhi sa lalawigan.
Gitumbok ni Loot nga ang Mid-North area sa Cebu maoy dunay labing baga nga mga rebeldeng NPA nga naglihok ug mao karon ang gitutukan sa iyang kapolisan ug sa militar sa pagsusi ug pagbantay.
Ang mid-north area sa Cebu sa mga nauna nang pakighinabi sa mga awtoridad sa militar ug kapolisan mibutyag nga maoy kasagarang tabukanan sa mga NPA gikan sa Negros, Bohol ug Samar.
Si Loot mibutyag nga una pa ang insidente sa Tagbilaran gipahibalo na niyang daan ang mga security personnel sa mga cellsites sa pagpahigayon og security survey sa ilang mga dapit diin mahimutang ang ilang mga antenna, ning paagiha kun masuta sa kapolisan ang kakulang sila na maoy mohimo og rekomendasyon kun unsay angay'ng usbon o ba kaha dugangan.
Midugang si Loot nga isip mga pribadong kompanya sila (communication companies) maoy responsable sa pagpangita og dugang mga sakop para mobantay sa ilang mga instalasyon samtang ang kapolisan maoy mohimo og pakisusi sa kung unsa pay kulang sa pagpangandam.
Miangkon si Loot nga bisan maayo ang kooperasyon sa mga Sugbuanon sa pagtug-an sa mga kadudahang grupo nga naglihok sa kabukiran malisod gihapon kun kini buhaton sa mga NPA kun gabii diin pabor kaayo ang pagpangatake.
Nunot niini kaniadto pa gikunsiderar na sa CPPO nga permanenteng dunay hulga ang mga cellsites ug gikinahanglan ang hugot nga pagbantay.
Samtang sa Cebu City Police Office gimanduan usab ni Supt. Melvin Gayotin ang mga sakop sa Service Security Group diha sa kabukiran sa pagdoble sa ilang pagpatrolya sa mga dapit diin dunay mga cellsites aron kapugngan ug mamonitor ang kalihukan sa mga rebeldeng NPA.