.357 ang gigamit Tawo nagpusil sa ulo

Usa ka tawo ang napalgang nagbuy-od nga naligo sa kaugalingon niyang dugo kinsa gituohang naghikog pinaagi sa pagpusil sa iyang ulo nga maoy nakaingon sa hinanali niining kamatayon.

Ang paghikog natigayon sa sulod sa servant's quarter sa panimalay niining gipuy-an nga nahimutang sa dalan A.S. Fortuna sa Banilad, siyudad sa Mandaue.

Ang namatay mao si Roy Javerea, 27 anyos, minyo nga lumad nga taga Catbalogan, Samar ug kasamtangang nagpuyo sa nahisgotang lugar nga iyang gitrabahoan.

Ang kalibre .357 nga rebolber nga napalgang nagkadugo sa tupad sa nahimutangan maoy gituohan sa kapolisan nga maoy gigamit sa biktima sa pagpusil sa iyang kaugalingon.

Si Michael Wasken nga kauban sa trabaho sa biktima miingon ngadto sa kapolisan nga gikuyogan pa niini sa pagsulod sa lawak kinsa nananghid na kini ngadto kaniya nga matulog.

Mohimo pa og dugang pakisusi ang kapolisan sa pagsuta kon may foul play ba ang kamatayon sa biktima.