Giila ang mga biktima mao si Ilo Ricci,hingkod ang panuigon ug molupyo sa maong lugar ug iyang 10 anyos nga anak nga si Angelo sa asawa niining Pinay nga si Maria Cristina .
Ang pamilyang Ricci nanag-iya og mga edipisyong paabangan sa mga langyaw nga nakaasawa og mga Pinay diha sa maong dapit.
Tulo ka wala mailhing mga tawo nga wala gani magtaptap sa ilang mga nawong ug pulos armado og pistola gitumbok sa mga biktima nga misulod sa ilang balay pasado alas singko sa hapon.
Sigun pa ni SPO1 Rodito Viovicente ang imbestigador sa Theft and Robbery Section sa Lapu-Lapu Police sa pakighinabi sa Banat News nga diha miagi ang mga suspek sa gate nga nabiyaang abli ug mideretso og sulod sa balay sa biktima. Naatol nga wala diha ang iyang asawa sa pagkahitabo.
Gikatahong kalit siyang gitionan sa mga suspek ug ginamit ang packaging tapes gipanggaid silang duha sa iyang anak ug pugsanong gidala sa ilang mga lawak ug didto gitanggong.
Human niadto giingong gipamutol sa mga suspek ang mga linya sa telepono ug gibungkag ang ilang mga kabtangan diin gipamutang ang ilang mga alahas ug salapi.
Nakuha sa mga suspek ang 700 nga European Dollars, mga nagkalain-laing mga mahalong alahas sa magtiayon, ug lisenyadong armas nga kalibre 38 rebolber sa iyang asawa.
Lakip sa nadala sa mga tulisan mao ang usa ka librong dunay mga karaang kwarta nga iyang collection diin pipila niini panahon pa ni Alemang si Adolf Hitler.
Human sa pagkuha daling nangikyas ang mga suspek samtang nangayo nalang sila og tabang sa mga silingan.