Tau naluwas kay mitago sa punerarya; Akrho man ang tag-iya sa punerarya

Usa ka sakop sa Tau Gamma Phi fraternity kinsa napusilan sa sakop sa Alpha Kappa Rho Fraternity naluwas human kini modagan ug mitago sa punerarya nga gipanag-iya sa usa sa mga opisyal sa Akrho niadtong milabay'ng gabii.

Ang biktima giilang si Josephus Javier, hingkod ang panuigon ug molupyo sa Inayawan, sakop sa Tau Gamma Phi samtang ang suspek kinsa nadakpan sa mga polis mao si Brando Ramirez,24, taga dalan Katipunan barangay Labangon ning dakbayan.

Sumala pa sa imbestigasyon sa Mobile Patrol Group ang biktima dunay usa ka kaubang brod nag-inom diha sa JRS store duol sa San Fernando Funeral nga gipanag-iya ni Richard Buscaino, ang spokesman sa Alpha Kappa Rho Fraternity sa Visayas.

Giingong ang suspek kinsa duna say usa ka kauban kalit nga miduol kanila ug gipaisa ang ilang mga sinina, dihang nakit-ang dunay mga paso ang ilang mga dughan(ritwal sa Tau Gamma) gikatahong milanit dayon si Ramirez og armas dayong pusil kanila samtang sila midagan palayo, diha naigo sa tuong bukton si Javier nga milapos sa ilok.

Sa karatol didto midagan si Javier sa punerarya aron unta magpatabang sa guwardiya apan giingong wala siya panumbalinga maong midiretso siya og sulod ug mitago didto sa kasilyas.

Nianang tungora misunod diay si Ramirez ug nahitabo na ang panaglayog nilang duha hangtud nga nailog niya ang kalibre 9 mm Ingram ug midagan siya pagawas.

Ang mga mirespondeng sila si SPO1 Wilfredo Salazar matud pa maoy gitawag ni Javier kinsa nagbitbit sa armas nga nailog gikan kang Ramirez ug nagpatabang sa mga polis ug gitug-an nga naa pa sa sulod ang suspek.

Si Ramirez sa iyang bahin mihimakak sa pasangil ni Javier, matud pa niya igo lang siya natulog diha sa 2nd floor sa punerarya kay mibisita siya kang Buscaino, apan kumbinsido ang MPG sa alegasyon ni Javier sanglit gikatahong mitakdo ang gipanug-an niini sa mga gisugilon usab sa mga testigos diha sa palibot nga si Ramirez maoy nagdala sa Ingram. r