Tresurera sa Guadalupe ipasusi sa Ombuds

Giawhag sa konseho sa barangay Guadalupe ang Ombudsman Visayas paghimo og imbestigasyon kabahin sa gikatahong anomaliya nga nahimo sa tresurera niini sa barangay.

Niadtong milabay'ng bulan sa Hunyo mipasar og resolusyon ang konseho sa barangay atol sa session niini nga nag-awhag sa Ombudsman pag-imbistigar sa ilang tresurera sa barangay nga si Violet Saguim.

Gani ang maong panghitabo gi-report na usab kini sa konseho ngadto sa Commission on Audit (COA) alang sa pagpahigayon og post audit sa tanang transaksiyon sa barangay.

Usa na niini ang gipanglaksi nga kinse ka resibo sa barangay nga i-isyu niadtong molukat og barangay clearance ug uban pang transaksiyon sa barangay.

Gibutyag ni barangay Konsehal Alex Semilla dihang nahinabi sa Banat News sa telepono nga niadtong petsa 1 sa milabay'ng bulan sa Agosto nagkuyog silang ABC President Eugenio Faelnar nga maoy barangay kapitan sa Guadalupe aron i-follow up sa COA ang gipahigayon niining post audit nga mokapin na sa tulo ka bulan nga wala gihapoy resulta.

Gibutyag ni Semilla nga didto nahibaw-an sab nila nga wala usab makahimo og cash book ang ilang tresurera niadtong milabay'ng tuig 2004 ug hangtud karung tuiga apan ang gikahibudngan nila og dako kun nganong padayon nga na-release ang ilang honorarium nga unta dili man kini ma-release kun walay cash book nga himoon ang tresurera sa barangay.

Laing nadiskubrihan nila ni Semilla ug Faelnar sa ilang pagbisita sa COA nga wala usab mo-remit ang ilang tresurera sa City Hall sa mga koleksiyon niini sa barangay apan nahibung sila gumikan kay padayon gihapon kining nakakuha og official receipt.

Kini tungod kay dili mahimong makakuha ug laing stub sa O.R. kun dili una ma-remit ang milabay'ng mga koleksyon niini sa unang resibo nga nahatag.

Matud ni Semilla kini maoy hinungdan nga gimando sa COA nga ipa-hold lang una ang honorarium ni Saguim sugod niadtong milabay'ng bulan sa Agosto samtang nagpadayun pa ang imbestigasiyon niini.

Si Saguim nagdawatan og kapin sa P9 mil nga honorarium matag bulan isip tresurera sa barangay Guadalupe.

Nunot niini, mipasar usab og resolusyon si Faelnar atol sa milabay'ng sesyon sa konseho sa dakbayan niadtong milabay'ng semana nga nag-awhag sa tanang mga tresurera sa barangay nga obligadong mohatag og report sa ilang mga koleksyon sa barangay.

Ang maong resolusyon ni Faelnar nga giaprobahan sa konseho gitumong aron ma-protektahan ang koleksiyon sa barangay gikan sa anomalosong katuyoan.