PNP alerto sa nationwide transport strike karon

Gibutang karon sa heightened alert ang mga sakop sa kapolisan sa kalabot niining "nationwide transport strike" sa mga transport groups aron pakanaugon sa puwesto si Presidente Gloria Arroyo ug ang uban pang mga yangungo kalabot sa expanded value added tax ug ang padayong pagsaka sa presyo sa lana.

Sa milabayng semana pa lang daan ang onse ka mga istasyunan sa kapolisan sa Cebu City Police Office gimanduan na sa pagsigurong naa sa 100 porsiyento ang mi-duty sa ilang mga sakop gumikan sa talandugon nga sitwasyon sa politika.

Hinuon bisan pa man sa kahigpit gimanduan gyud ang kapolisan sa pagpatuman sa maximum tolerance .

"The PNP Rules of Engagement shall be observed. Field personnel shall be properly briefed specially on the conduct of proper arrest and deployment," sumala pa sa suwat pahimangno sa tanang police units.

Samtang ang Criminal Intelligence and Investigation Branch gimanduan na usab sa pakigtambayayong sa Homicide Section, Theft and Robbery Section ug Warrant Sections sa pagpaniid sa mga pundok nga posibleng hulga sa kalinaw atol sa strike.

Karong adlawa tanang mga stations commanders gimanduan nga mopadala og walo sa mga sakop sa operations center sa City Hall alang sa pagkuha og mga instruksyon kalabot sa strike nga mahitabo, lakip na ang pagbutang og mga tropa sa mga choke points diin magtapok ang mga welgista sa dalan.

Samtang ipakatap sa City Hall ang 25 ka mga bus, 60 ka mga multicab ug mga multicab sa mga barangay aron maoy alternatibo sa mga matanggong sa dalan