Sidewalk vendors miapelar sa CH

Mi-apelar sa kagamhanan sa siyudad sa Sugbo ang mga sidewalk vendors nga sakop sa Alyansa sa Manindahay sa Sugbo (ALMA-Sugbo) nga hatagan sila og gamayng konsiderasyon sa ilang pagpaninda sa mga sidewalk nga dili kanunay'ng mahulga sa mga ipatumang demolisyon sa siyudad.

Kini gumikan sa nasinati karong krisis sa nasud nga miresulta sa pagminus usab sa ilang kinitaan matag adlaw ilabi na gyud ning gipatumang sistema sa nasudnong kagamhanan nga pagsagop sa pagdaginot sa konsumo sa kuryente.

Kini tungod kay matud sa tigpamaba sa ALMA-Sugbo Rex Deldig mikunhod ngadto sa 45 porsyento ang adlaw-adlaw nilang halin gumikan sa panawagan nga pagdaginot sa kuryente.

Matud ni Deldig nga gikan sa P700 unta nga adlaw-adlaw nilang halin nahimo na lang kini karong P385 pa-ubos matag adlaw human gipatuman ang panawagan sa pagdaginot ug sa maong kita P100 lang niini ang malimpyo nilang ganansiya matag adlaw nga kulang kaayo sa adlaw-adlaw'ng panginahanglan sa ilang pamilya.

Resulta usab kini sa pagdaginot sa mga ordinaryong mamumuo sa ilang kunsumo gumikan sa kamahal sa mga palaliton nga halos dili na paigo ang suweldo niini pagtubag sa nag-unang panginahanglan.

Gawas sa hangyo sa ALMA-Sugbo nga hatagan sila og konsiderasyon nga magpabilin nga luwas sa pagpaninda sa mga sidewalk ug ubang lugar dinhi sa dakbayan gihangyo sab nila ang gobyerno sa pag-review o ba kaha pagbasura sa Akta Republika No. 8479 (Downstream Oil Deregulation Act of 1998) nga maoy hinungdan nga nagpatuyang na lang ang mga kompaniya sa lana sa pagpa-umento sa presyo sa mga produktong petrolyo.