Sikyu gi-salvage

Patay na nga napalgan ang usa ka security guard kinsa gikataho nga gi-salvage hinungdan nga nakaangkon og mga samad pinusilan sa iyang lawas ug ulo kagahapon sa buntag diha sa barangay Lawaan I dakbayan sa Talisay.

Ang biktima mao si Jorge Luchavez, hingkod ang panuigon residente sa maong lugar ug security guard sa Jollibee Mango Avenue.

Ang biktima usa sa gipasanginlan nga kawatan og manok sa lugar matud pa sa silingan niini nga gikahinabi sa Banat News kagahapon sa buntag.

Ang mga suspetsado upat ka wala mailhi nga lalaki kinsa sakay og usa ka pula nga Tamarraw FX.

Base sa pasiunang imbestigasyon sa kapolisan sa Talisay nga gihagbong sa mga suspetsado gikan sa sakyanan diha sa nahisgutang lugar ang patay'ng lawas sa biktima diin gi-usban pa gyud kini sa pagpusil una pa mipasutoy og padagan sa sakyanan pahilayo sa maong lugar.

Ang kapolisan sa Talisay mipahigayon og follow-up nga imbestigasyon sa maong hitabo. - Uban ni Shiela Mae Abdon, CNU Intern