Ang mass wedding nga gipahigayon didto sa Christ The King sa barangay Alang-Alang giselebrar ni Father Marnel Mejia.
Human sa maong kasal ang bag-ong mga magtiayon gipasakay og tartanilya nga may mga dayandayan ug gidala kini sa barangay Opao alang sa usa ka salo-salo nga gipahigayon sa mini gym.
Ang mass wedding nga gipasiugdahan sa kagamhanan sa maong dakbayan maoy kabahin sa mga kalihukan sa kapistahan sa Birhen sa Santa Rosa nga maoy patron sa barangay Opao sa maong dakbayan nga nagsaulog niadtong Sabado, Agosto 27 niining tuiga.
Si Jonkie Ouano, kamanghurang anak nga lalaki ni Mayor Thadeo Ouano kinsa maoy presidente sa maong kapistahan maoy nangulo sa pagpasiugda sa maong kalihukan kinsa mi-apod-apod usab ngadto sa bag-ong magtiayon og tagsa ka electric fan.
Si kanhi Mayor Alfredo Ouano, Bise Mayor Amadeo Seno, mga Konsehal Raul Cabahug, Rosita Benabaye maoy principal sponsor sa kasal sa bag-ong mga magtiayon.
Ang maong mga kinasal nagtipon na sa pagpuyo sulod sa lima ngadto na sa 18 ka tuig ug may mga anak na ang pipila kanila.