Closure order vs printahanan nga na-meke gipirmahan

Gipirmahan na ni Mayor Tomas Osmeña ang closure order kun pagpasira sa operasyon sa Gold Finger Printing Shop nga nadiskubrihang tig-imprinta sa peke nga SRP pass ug uban pang mga dokumento nga nahimutang diha sa may North Reclamation Area ning dakbayan.

Ang operation officer sa Revenue Task Force Cristopher Ong maoy gitahasan pagpatuman sa maong closure order nga gi-serve kagahapon sa ala-una sa hapon.

Gibutyag ni Osmeña nga bisan pa og mohangyo nga makig-areglo og mobayad ug settlement fee ang tagdumala sa maong establisamento dili gyud niya kini tugotang makabalik og operate gumikan kay bug-at ang kalapasan niining nahimo nga mao ang pag-fake sa public document sama sa SRP pass.

Nasayran nga nasakpan usab nga tig-imprinta ang maong establisamento sa mga peke nga driver's license, peke nga business permit ug uban pa.

Gipahibalo ni Osmeña nga pasakaan usab nila og kasong kriminal nga falsification of public documents ang maong printing shop gawas sa duha ka kaso nga una nang gipasaka sa mga sakop sa NBI nga maoy mironda ug nakadiskubri sa peke nga mga dokomento niini.

Matud ni Osmeña panahon na nga suwayan nila og pa-priso ang ingon niining mga printing shop nga nagpahigayon ug illegal nga operasyon aron mahadlok ang uban ug mohunong na sa dautang mga buhat.

Dako ang pagtuo ni Osmeña nga duna pay daghang mga susama ining buhatan dinhi sa dakbayan nga nagpahigayon og ilegal nga mga transaksiyon.

Nasayran nga gitugotan ni Osmeña nga makabukas og balik ang gipasirad-an nga Halo Disco Bar nga nasakpan nga migamit og peke nga business permit ug walay liquor permit human kini mibayad ug settlement fee nga mokabat sa P300 mil.