Baba gibabha sa vigilantes

Laing lalaki ang gituohang gitumba sa mga gidudahang vigilante sa dalan General Gines barangay Suba ning dakbayan niadtong nakalabay'ng gabii.

Nababha ang baba ug dughan sa biktimang si Cruz Jorjio, 26, minyo kasamtangang nagpuyo sa iyang maguwang didto sa Minglanilla ug bag-uhay lang miistambay sa panimalay sa iyang inahan sa maong lugar.

Base sa imbestigasyon usa ka wala mailhing tawo ang miduol sa biktima samtang kini naglingkod diha sa dalan ug walay daghang pangutana gidul-itan kini og pusil sa baba ug dughan.

Human sa pagpamusil daling miikyas ang suspek, gisusi na karon sa kapolisan kun duna bay rekord sa kapolisan o di ba kaha dunay nakaaway ang biktima sanglit sigun pa sa inahan niini nga si Dolores modalikyat lang og uli ang biktima sa iyang balay aron mokaon dayong lakaw na usab.

Samtang sa laing bahin gilapsag bala diha sa bukobuko ang usa ka Richelleto Torrefeil,29, taga Sitio Kalubihan, Banawa-Guadalupe ning dakbayan human kini pusila sa kaaway sa iyang bayaw nga si Richard Racho Veraces,28.

Ang suspek buot mobawos sa bayaw sa biktima nga si Ernesto Obrador igsuon sa kapuyo ni Torrefeil apan kay wala kini didto siya maoy gibirahan sa suspek.