Dughan sa gipusil nababha

Nababha ang dughan sa usa ka tawong gipusil sa iyang silingan didto sa sitio Ipil-Ipil, Uling, Naga niadtong Miyerkules sa gabii.

Ang biktima nailhan nga si Wilfredo Alcover alias Boy Alcover, 40, minyo, taga Ipil-Ipil, samtang ang mipusil usab kaniya mao si Randy Ocan, hingkod, minyo, silingan ra sa biktima.

Si SPO1 Arnulfo Himota kinsa usa sa mga mirespondeng polis sa alarma nagkanayon nga gawas sa pagkabuslot sa tuong dughan sa biktima, may mga samad pa kining upat sa nagkalainlaing bahin sa iyang lawas agi sa wala hiilhing kalibre sa bala.

Gidala dayon kini ngadto sa Don Vicente Sotto Memorial Medical Center sa dakbayan sa Sugbo aron masalbar.

Nasayran nga ang biktima nagsakay sa iyang motorsiklo nga nangompra gikan sa sitio Das, Lutopan, Toledo City dihang pag-abot niya sa ilang balay gipusil siya.

Matud pa sa asawa sa biktima nga wala pa makasaka sa ilang balay ang biktima dihang mipaka ang mga buto-butosa armas.