Presyo sa palaliton monitoron

Gitinguha sa mga opisyal sa siyudad sa Sugbo nga mamonitor ang tanang mga magpapatigayon dinhi sa dakbayan pagsiguro nga dili kini magpataka pagpa-umento sa presyo sa mga nag-unang palaliton nonot ning way hunong nga pagsaka sa presyo sa mga produktong petrolyo.

Kini human mipadayag og kabalaka ang tsirman sa committee on commerce trade and industry Konsehal Arsenio Pacana nga posibleng moresulta ngadto sa kagubot kun pasagdang magpatuyang na lang sa pag-umento ang mga nag-unang palaliton.

Kini tungod kay ang mga kabus nga molupyo maoy siguradong ma-apektuhan niining tanan nga gikahadlokan niya nga moresulta kini ngadto sa pagka-aborido sa ulo diin mohimo na sa mga dautang buhat aron lang makasustiner sa adlaw adlaw niining panginahanglan.

Gi-awhag sa konsehal ang tsirman sa Local Price Monitoring Council Nigel Paul Villarete alang sa dinaliang pag-convene sa maong komitiba aron mohimo kini og higpit nga pag-monitor sa tanang mga nag-unang palaliton dinhi sa dakbayan.

Kini aron masumpo ug malikayan ang posibling pagpahimulos sa ubang mga negosyante nga mosakay sa higayon nunot ning walay hunong nga pag-umento sa presyo sa produktong petrolyo.

Nasayran nga gitakdang magtigum ang mga sakop sa Cebu Chamber of Commerce and Industry aron hisgutan ang pagpatuman og mga austerity measure agi'g pagsanong sa panawagan ni Presidente Arroyo nga magdaginot sa paggamit sa mga produktong petrolyo aron malikayan ang gikabalak-ang krisis sa enerhiya.