Welder gipangayoa'g cellphone sa tulisan, giluba

Wala magdahum ang usa ka welder nga kun wala kay cellphone mabutang sa peligro ang iyang kinabuhi gikan sa mga kamot sa mga tulisan dihang wala siya napakitang telepono dihang gitulis kini sa milabay'ng gabii.

Samdan sa tuong bahin sa dughan agi sa pagpanunggab sa duha ka batan-ong gidudahang tulisan ang biktimang si Edwin Cuyos,30, minyo ug molupyo sa Sitio Mahayahay Barangay Pardo ning dakbayan.

Si Cuyos, matud pa sa kapolisan, kasamtangang nagpaabot og masakyang PUJ pauli diha sa eskina sa mga dalan Leon Kilat ug P.del Rosario dihang giduol siya sa duha ka mga batan-on.

Gikatahong gipangutana siya sa duha kun duna ba kini cellphone apan sa iyang pagtubag nga wala siya niini giingong kalit nga milanit ang duha og mahait nga hinagiban dayong nagtabang nga midunggab kaniya makadaghang higayon.

Ang biktima naigo gyud makausa sa dughan hinungdan nga daling nangikyas ang mga suspek palayo sa maong lugar samtang ang biktima nagpahatud ngadto sa Cebu City Medical Center.

Ang kapolisan nangangkong kanunay nga dunay mga police beat patrol dihang dapita.