Macias dili mo-inhibit

Dili gyud mo-inhibit sa iyang kaugalingon si House Committee on Local Government Chairman Emilio Macias bisan unsaon pa og panawagan sa mga Sugbuanong lider dinhi sa lalawigan sa Sugbo kalabot niining pasangil nga dili siya "patas" sa iyang baruganan sa duha ka habig sa isyo sa pagbuak sa Sugbo. (Related story sa pahina 2)

Si Negros Oriental Macias sa pakighinabi sa lokal nga sibyaanan dinhi kusganong mibarug nga walay rason aron siya mo-inhibit isip tsirman sa komitiba ug gani miingon pang mas maayong maghilom nalang ang mga dunay disgusto kaniya.

Si Rep.Antonio Cuenco mipadayag nga mohimo silag mga lakang aron makapasaka og pormal nga petisyon aron ipa-inhibit si Macias sa pagka-tsirman niini gumikan sa pasangil nga bias kini sa iyang posisyon, sanglit sigun pa niya igo lang siya mosusi kun makapasar ba ang mga pro-Sugbuak sa mga rekisitos.

Gilaraw sa mga magbabalaod kontra sa Sugbuak nga dinhi ipahigayon human didto sa Manila ang mosunod nga public hearing apan si Macias miklaro nga wala nay angayang himuong hearing dinhi kay matud pa niya naa na tanan didto sa kauluhan ang gikinahanglan aron pagpahigayon sa maong hearing.

Sigun pa niini dili mausab sa paghimo og public hearing dinhi kung unsay naa sa mga ahensya sa gobiyernong naghatag sa ebidensyang gipangita sama sa tinuig nga income,populasyon ug teritoryo.

Sumala pa niya nga ang plebisito nalay angayang paabuton sa mga Sugbuanon aron makapadayag sa ilang sintimiyento.