Hubas sa tubig gi-deny sa Salcon

Gipanghimakak sa tagdumala sa Salcon Power Corporation sa Naga ang pasangil sa taga barangay Tangke, Naga nga mihubas ang ilang tinubdan sa tubig kay gihurot og suyop sa planta sa Salcon.

Maoy hinungdan nga ang ubang molupyo sa maong barangay miduyog sa mga miyembro sa Cebu Alliance of Renewable Energy (CARE) tungod kay nabalaka sila nga labi pa silang maalaot kon matukod na ang bag-ong planta sa Salcon uban sa Korean Electric Power Corporation (Kepco).

Apan si Salcon manager Raul Estrelloso nagkanayon nga dili lamang ang taga Tangke, Naga ang nahubsan og tubig sa miaging ting-init ug may ubang tinubdan sa tubig ang gikuhaan sa mga gigamit sa Salcon sa ilang inadlaw-adlaw'ng operasyon.

Busa alang kang Estrelloso dili angayan silang pasanginlan nga maoy nagpahubas sa tubig sa barangay Tangke.

Sa bahin sa tukoronong planta nga balor og $270 milyones, si Estrelloso nagkanayon nga dili sila manghilabot sa tubig gikan sa kayutaan sa Naga.

Kini tungod kay may kaugalingong desalination plant ang Salcon nga maoy mohikay sa tubig sa dagat aron magamit sa panginahanglang tubig sa planta adlaw-adlaw.

Sayo niini ang taga Tangke, Naga nagkanayon nga ang dako nilang tangke sa tubig gimarkahan nila og TWS kon Tangke nga Way Sulod.

Kini tungod kay nag-uga nalang ang maong tangke kay wala nay tubig nga ikasulod niini.

Ang kalisod sa tubig nga mainom sa maong barangay nakapabalaka sa mga molupyo nga mohugpa ang sakit sa palibot.

Apan ang kagamhanan sa lungsod pinaagi ni Mayor Ferdinand Chiong misusi sa hinungdan ning maong suliran sa tubig sa Tangke.

Matud pa ni Chiong nga kasagaran sa mga hinungdan sa paghubas sa tubig sa ubang mga lugar sa Naga mao ang kagrabe sa init ug huwaw sa milabay nga mga buwan.