Ex-brgy treasurer nasikop sa drug raid

Kanhi barangay treasurer sa Barangay Daantabogon sa lungsod sa Tabogon maoy naapil sa pagkasikop uban sa iyang silingan gumikan sa ronda nga gihimo sa kapolisan batok sa drugas niadtong milabay'ng Martes sa buntag.

Si Susana Inujales,46, minyo ug molupyo sa naasoy'ng barangay kanhi tresurera sa ilang barangay ug silingang si Dioscoro Bascos, 55, minyo nangasikop pinasikad sa search warrant nga giisyu ni Judge Antonio Marigomen.

Si Tabogon Police Chief, Police Insp. Wilfredo Giducos nagkanayon ang duha dugay nga gipanid-an sa kapolisan gumikan sa pagkalambigit sa maong ilegal nga drugas.

Nakuha sa maong ronda ang 33 ka paketeng may sulod nga gidudahang shabu ug gituohang halin sa drugas nga P500 diha sa balay ni Inujales.

Samtang sa balay ni Bascos, nakakuha ang kapolisan og unom ka paketeng may sulod nga gidudahang shabu ug kwartang gidudahang halin sa ilegal nga drugas nga P5,540 .

Ang duruha parehong gitanggong karon sa karsel ug gikatakdang pasakaan og kasong paglapas sa Akta Republika 9165.