Ang Pangulo maoy pinasidunggang dinapit sa maong mga kalihukan ug giisip ang pagtambong niini mahilayo siya bisan makadiyot sa mga problemang giatubang didto sa Manila nunot niining mga pasangil nga gibato ngadto kaniya ug sa iyang banay.
Sigun pa sa Public Information Office -7, gipaabot nga mouban sa presidente mao si Visayas Presidential Consultant Cerge Remonde ug Department of Tourism Secretary Ace Durano, gikatakdang moabot pasado alas 12 sa udto.
Modiretso ang pangulo sa ipahigayong awarding ceremony sa mga Most Outstanding Barangay Health Workers of Cebu City diha sa New Cebu Coliseum ug gipaabot nga siya maoy mohatag sa pasidungog sa mapiling BHW.
Gikan didto si Arroyo moadto sa Timex Philippines aron maoy pormal nga mobukas sa expansion facility sa maong kumpanya.
Human didto molahos si Arroyo sa inauguration ceremony sa water treatment facility diha sa Philippine Export Zone Authority. Walay gikatakdang pakigkitaan si Arroyo sa mga sakop sa media sanglit human sa kalihukan sa PEZA mobalik kini sa kauluhan alang sa ubang mga gimbuhaton.- Edwin Ian Melecio