Kini sa dihang nakita niya nga daghan kaayong misupak sa katukoran sa maong planta tungod sa uling kon karbon nga isugnod niini.
Apan atol sa public hearing niadtong Sabado iyang gipasabot sa tanan nga dako unta kaayo og ikatabang ang maong planta nga tukoron sa Salcon Power Corp. ug sa Korean Electric Power Corp. (KEPCO).
Matud pa ni Chiong nga gipasabot na pag-ayo sa taga Salcon sama ni Reinerio Lastimoso nga pulos kaayohan ang maani sa Naga niining maong proyekto ug walay kadaotan.
Kini ang bahin sa kauswagan sa panginabuhi sa taga Naga ug panalapi sa lungsod.
Gani dihang miwitik og pangutana si Mayor Socrates Fernandez sa Talisay City kinsa usa sa mitambong sa maong hearing, kon dili ba peligrong mohubas ang tubig sa Naga, gumikan sa planta, si Lastimoso mipasalig nga dili apiktahan ang tubig sa lungsod.
Kini tungod kay ang tubig sa dagat hikayon aron motab-ang.
Matud pa ni Chiong nga anugon kaayo kon mosaler ang pagbabag sa ubang mga grupo ning maong proyekto.
Ang kaayohang idulot niini matud niya dili lamang para sa Naga kundili para sa lalawigan sa Cebu.