Nasunogan sa Labangon tabangan

Gipaabot nga madawat na sa dili madugay ang mga housing materials ug uban pang mga kagamitan sa 37 ka pamilya nga nabiktima sa dakong sunog sa Sitio Cogon, Barangay Labangon ning dakbayan niadtong petsa 5 sa milabay'ng bulan sa Hulyo.

Karong Miyerkules atol sa sesyon sa konseho sa dakbayan mopasar og resolusyon ang tsirman sa Committee on Social Services Konsehal Gerardo Carillo alang sa pagpagawas og pundo nga P186,878 aron magamit sa mga panginahanglan sa nahisgutang mga pamilya.

Ang maong gahin mao kini gamiton sa pagpamalit og mga housing materials ingon man mga kagamitan niini sa panimalay isip hinabang sa siyudad sa maong mga pamilya nga nakasinati sa maong kalamidad.

Ang maong kantidad naglakip na sa food assistance nga gipang-apod apod sa Department of Social Welfare and Services sa siyudad ngadto sa mga apektadong pamilya atol sa pagtumaw sa sunog.

Ang maong gahin adto kini kuhaon sa P6 milyones nga pundo sa calamity fund sa dakbayan sa siyudad sa Sugbo alang karong tuiga.

Mokabat ngadto sa 145 ka indibidwal ang apektado sa milabayng sunog sa Sitio Cogon, Labangon.