Aboitiz kolektor gitiona'g sanggot

Kinolektang salapi gitulis sa duha ka tawong armado og bolo ug sanggot nga kalit milayat sa motorsiklong gimaneho sa kolektor diha sa barangay Cantubaon lungsod sa Tabuelan niadtong milabay'ng adlaw.

Nabalit-ad ang motorsiklo sa biktimang si Henry Sombilon,23, kolektor sa Aboitiz Foundation Incorporated ug molupyo sa barangay Bagasawi, Tuburan dihang duha ka wala mailhing mga lalaking nagtaptap og bonnet sa ilang mga nawong ang kalit nga milayat kaniya diha sa may utlanan sa lungsod sa San Remegio ug Tabuelan.

Pagkatumba sa biktima gikatahong dali siyang gitionan sa gidalang sanggot ug bolo sa duruha dayong deklarar og tulis, ang bag ug pitaka sa biktima nga may sulod nga mga importanteng dokumentos ug kwartang P31 mil ug cellphone nga Nokia 3315 maoy nakuha sa duruha.

Matud pa sa kapolisan ang biktima gikan pa nakigtagbo sa mga miyembro sa Aboitiz Foundation Inc.uban sa pagpangolekta dihang sa pagpauli na niini nahitabo ang pagpanulis sa maong lugar .

Nagduda ang kapolisan posibleng dugay nga napanid-an ang biktima sa mga tulisan nga gituohan usab nga mga taga diha ra sa maong lugar.