Hapon gipapriso sa VM kay naniko ug nanukmag

Hapones gipapriso sa bise mayor sa usa ka lungsod sa Negros Oriental human maniko ug nanumbag kaniya sulod sa usa ka dakong department store ning dakbayan niadtong milabay'ng adlaw.

Ang mireklamong gidagmalan mao si Dauen Bise Mayor Francis Lora Yap Araola, 28, sa Negros Oriental kinsa kasamtangang nagbayad unta sa iyang mga pinalit sa counter diha sa dakong department store dihang mahitabo ang insidente.

Sa imbestigasyon sa kapolisan sa Mabolo Police Station nakugang nalang si Araola dihang kalit siyang gisiko ni Takayuki Takai,48, minyo ug molupyo sa Sahamaken Fukayashi Hagishiga, Japan ug temporaryong nagpuyo sa dalan S.Cabahug Barangay Mabolo ning dakbayan.

Gikatahong si Takai namalit usab niadtong higayuna apan naulahig linya kang Araola diha sa counter apan gikatahong misuksok gyud ang suspek dayong siko sa tiyan ni Araola.

Si Araola misanting sa gihimo ni Takai maong iya kining gikomprontase ug mipaila sa iyang kaugalingon nga Bise Mayor sa ilang lungsod apan gikatahong wala motahod ang suspek ug gihulagway nga hambugero pang mitubag sa biktima dayong sumbag diha sa dughan ni Araola.

Gumikan sa gihimo ni Takai mitawag si Araola kang Carlo Balasoto ang house detective sa maong mall ug maoy misikop sa suspek.

Si Takai gikatakdang pasakaan og kasong Unjust Vexation sa biktima ngadto sa piskalya.