Si del Mar kinsa maoy Deputy House Speaker mitug-an sa Banat News nga kun tinuod pa ang pangangkon sa oposisyon giwara-wara na unta kini sa mga kontra ni Arroyo aron mapadali ang proseso sa pagpasaka sa reklamo.
Ang oposisyon pinaagi nila ni Kongresista Teofisto Guingona III ug Kongresista Joel Villanueva nangangkon niadtong milabay'ng adlaw nga nakakuha na gyud ang oposisyon sa one-third votes gikan sa 236 ka mga kongresista aron maderetso na sa Senado ang impeachment complaint.
Apan ang duha pulos midumili sa pagbutyag kun si kinsa ang maong mga kongresista sa kabalakang maimpluwensyahan kuno sa palasyo.
Nunot niini si del Mar mihagit sa oposisyon sa pagprobar sa ilang pangangkon. Matud pa ni Del Mar nga posibleng gihimo lang kini sa oposisyon aron ma-pressure ang committee on justice nga dalion ang proseso.
Sanglit kun duna nay 79 ka mga signatories mahimo nang dalion sa committee on justice ang proseso sanglit maka-overturn man ang one-third votes sa proseso. Dako ang pagtuo ni Del Mar nga dili tuod imposible nga makakuha og 79 botos ang oposisyon apan maglisod gyud sila sa ilang tinguha.
"Dili gyud na katuohan , ipakita nila kun duna na, kay kung naa pa ila na untang gipakita basin gani iwara-wara pa na nila nga gisumiter sa committee on justice,"asoy pa ni del Mar.
Hinuon giklaro ni del Mar makumpleto man o dili ang 79 ka signatories sa oposisyon pabor sa impeachment moagi gihapon kini sa committee on justice aron tinuon ang sufficiency in form ug sufficiency in substance, dayon mohimo pa gihapon og full blown hearing alang sa pagtino sa probable cause niini.
Human sa resulta mohimo ang committee on justice og rekomendasyon kung ipadayon ba o dili ang pagsang-at sa articles of impeachment ngadto sa Senado, apan iagi gihapon kini sa botohay ug magkinahanglan gihapon ang pabor ug dili sa 79 ka mga botos.