Samdan sa buko-buko ug walang bitiis si Maricor Jusayan,27, minyo ug molupyo sa naasoy'ng dapit gumikan sa pagkaigo sa mga shrapnel sa granadang miulbo.
Si PO3 Marcelo Lerio sakop sa Special Weapons And Tactics(SWAT) sa Cebu City Police Office mitug-an sa Banat News nga ang mibutong granada usa ka military type MK-2 fragmentation grenade nga bag-o pa.
Gituohan ni Lerio nga posibleng silingan ra sa biktima ang suspek nga milabay sa granada sanglit nagdikit raman ang kabalayan ug posible usab nga duna ray nagduwa-duwa niini ug gilabog og tuyo.
Ang biktima mitug-an sa mga imbestigador sa Homicide Section nga kasamtangan siyang nagpreparar sa ilang panihapon dihang kalit nga dunay milagubo sa ilang atop.
Nagtuo siya nga dunay namato nga silingan sanglit nadunggan pa niyang miligid pa ang maong butang diha sa atop apan nakugang nalang siya dihang miulbo kini sa taas.
Ang mga shrapnel kun plumo sa granada nga nanglupad atol sa pagbuto, duha niini ang misignit sa buko-buko ug bitiis ni Jusayan hinungdan sa pagkalandig niini sa tambalanan.
Ang mga eksperto sa bomba sa SWAT pinanguluhan ni Lerio maoy nanguha og ebidensya sa pagtino kun unsang matang sa granada ang miulbo.