Pinanser sa marijuana plantation gipangita

Utok ug gidudahang financier sa mga marijuana plantations sa mga bukirong barangay dinhi sa lalawigan gipangita na karon sa Cebu Provincial Police Office (CPPO).

Gitug-an ni CPPO Director Sr. Supt Drusillo Bolodo nga gumikan sa pagkabisto sa mga dagkong marijuana plantations sa tulo ka mga sitio sa Barangay Bayong lungsod sa Balamban dako ang posibilidad nga dunay nagpundo sa mga mag-uuma aron mananom niini.

Si Bolodo mibutyag nga gawas sa Balamban dunay mga impormasyong nadawat ang iyang buhatan nga duna say mga plantasyon og marijuana sa lungsod sa Barili ug Pinamungajan.

Matud pa sa direktor sa CPPO mas mapadali ang pagpuo niining mga plantasyon kun kanunayng may mga intelligence report nga maabot sa buhatan sa kapolisan diin kini ipananom.

Ang maong mga dapit nga gihimong mga plantasyon giingong paborable ang klima ug temperatura para niining mga matanga sa pananom, gawas pa niana layo sa mga tawo ug dili kaayo maagian sa kapolisan.

Matag dunay madiskubrehang plantasyon motumaw nga duna gyuy nag-finance niini nga mao usab ang mopalit sa mga maaning marijuana nga dad-on sa mga nagkadaiyang dapit dinhi sa Sugbo ug sa Negros.

Gituohang mas nakit-ang dako og abot ang pagtanom sa maong iligal nga pananom kun itandi sa ordinaryong utanon nga ugmaron sa mga mag-uuma.

Giawhag karon ni Bolodo ang mga lokal nga kagamhanan sa paghatag og dugang ayuda sa mga mag-uuma aron dili mosulod niining matanga sa pagpananom.