Kampanya batok druga sa mga barangay sa Mandaue

Gimanduan ni Mayor Thadeo Ouano ang tanang mga kapitan sa barangay sa dakbayan sa Mandaue nga muhatag gayod sa ilang makanunayon nga suporta ngadto sa kapolisan bahin sa kampanya niini batok sa suliran sa gidiling drugas.

Si Mayor Ouano miluwat sa maong kamanduan sa dihang nakigtagbo kini sa mga kapitan sa barangay diin ilang gituki ang problema sa ilang tagsatagsa ka barangay ug usa niini ang kabahin sa gidiling drugas.

Matud pa ni Ouano nga sa miaging mga adlaw adunay sunod-sunod nga kalampusan nga nahimo ang kapolisan batok niadtong nalambigit sa pagpayuhot sa gidiling drugas.

Apan giangkon sa mayor nga gikinahanglan pa gayod ang makanunayon nga suporta sa mga opisyal sa barangay.