NPA rebels nangabot alang sa rali Kompirmado sa Militar

Gikompirmar kagahapon sa Central Command nga dunay mga gidudahang mga sakop sa New People's Army ang nangabot gikan sa Negros sa managlahing mga adlaw nga gituohang mosagol sa mga raliyista ugmang adlawa.

Si Central Command Spokesman Lt.Col. Jefferson Omandam nagkanayon nga nakompirmar sa ilang mga intelligence agents ang mga report nga dunay mga armadong tawo nga nangabot diha agi sa tulo ka mga dapit sa lalawigan sa Sugbo.

Unang natahong dunay midunggong pumpboat niadtong Hulyo 5 didto sa Sitio Aroma, Barangay Dumlog, dakbayan sa Toledo diin dunay luwan 10 ka tawong giingong dunay mga dalang dagkong bagahe nga gituohang mga tag-as nga armas.

Ikaduhang nasigpatan niadtong Hulyo 16 diha midunggo sa barangay Boanoy lungsod sa Balamban susama gihapon nga nagsakay og pumpboat apan mas daghan kini og sakay sanglit dunay kapin 20 ka mga lalaki ug babaye nga may dala usab nga dagkong mga bag nga gituohan gihapong mga armas ang sulod.

Ang ikatulong namatikdang pag-abot nahitabo diha sa lungsod sa Barili apan wala maklaro kun pila ang luwan niini ug kung duna bay mga dalang tag-as nga armas.

Si Omandam nagkanayon nga duna nay gibuhiang pamahayag ang New People's Army nga samukon ang mga pundok sa raliyista aron kini mahulog sa kagubot ug miawhag sa mga nag-organisa sa mga rally nga bantayan ang ilang pundok basin masagulan sila og mga rebelde.

Gikahadlukan ni Omandam nga kun makasagol sa mga pundok sa mga nagprotesta ang maong mga gidudahang rebelde momugna kini og operasyon nga makatribukar sa kagubot tali sa kapolisan.

Ang tigpamaba sa New People's Army nga si Gregorio "Ka Roger" Rosal sa milabay'ng semana namahayag nga pangusgan sa NPA ang operasyon batok sa militar isip tampo sa pagpalagpot kang Arroyo.

Apan gipanghimakak niini ang nanggawas nga balitang mangapil ang ilang mga sakop sa mga raliyista aron samukon ang kalihukan, siya nangangkon nga niadtong Edsa One lang sila mikanaog og misalmot sa mga kalihukan sa dalan ug sukad niadto wala na kini tuguti.