Matud ni Mangaoang nga ilegal ang pagdakop ug pag-hold sa Mandaue City Police Office sa kargamento tungod kay adunay mga kaso nga nadesisyonan sa Korte Suprema nga nagkanayong ang Bureau of Customs, pinaagi sa district collector, lamang ang makadakop, maka-eksamin, ug maka-hold og imported nga kargamento.
Sumala pa niya nga aduna nay mga huwes nga gikasab-an, gisuspenso ug gitaktak sa Korte Suprema tungod sa pag-isyu niini og search warrant aron ma-eksamin ang imported nga kargamento tungod sa doktrina nga bugtong ang customs lamang ang adunay gahum niini.
Nagplano si Mangaoang nga kasuhan ang kapolisan kun mapakyas kini sa pagtugyan sa BOC-Cebu sa gisakmit niining kargamento.
Ang maong kargamento na-release na unta sa Criminal Investigation and Detection Group-7 human giingong nagsabot og P15 mil ang kapolisan, pinaagi ni Chief Insp. Ferdi Vaño. Apan sa dihang naabot kini sa Mandaue, gidakop kini sa Mobile Patrol Group nga gipanguluhan ni Deputy chief Emmanuel Ughoc tungod sa kalapasan sa balaod sa trapiko. Gikuhaan og cellphone ang drayber, gipalakaw, ug giguyod ang kargamento paingon sa kampo.
Si Mandaue City Police Director Pablo Florante Lamosao Jr. nagkanayon nga gitugyan na nila sa korte ang kargamento tungod kay nabuksan kini pinaagi sa search warrant nga giisyu ni RTC Judge Ulric Cañete. - John Rey Saavedra