Ang nasikop giilang si Giovanni Pacaldo Toring, 27, ug runner niining si Jamaica Lumogdang Chavez human nila baligyai og shabu ang poseur buyer nga polis nga si PO3 William Homoc sa Lapu-Lapu Police.
Sigun pa sa imbestigasyon si Chavez ang mikuha sa kwartang P100 nga marked money gikan sa PO3 Homoc samtang si Toring maoy mitunol sa shabu diha sa polis atol sa buy bust operation hinungdan sa ilang pagdakop.
Apan dihang dakpon na si Toring nakahimo pa unta sa pagdagan sulod sa balay sa amahan niini apan didto sa balay duna nay nagpaabot nga laing team sa kapolisan maong nasikop gyud kini ug nakuhaan pa usab og laing 10 ka paketeng gidudahang shabu diha sa iyang posesyon.
Human dad-a sa presinto mikuha ang grupo ni Inspector Francisco Baguio og search warrant gikan sa korte ug gibalikan ang balay sa suspek uban sa mga opsiyales sa barangay hinungdan sa pagkasakmit og laing unom ka paketeng may sulod nga gidudahang shabu ug mga gamit para pag-repack niini.
Lakip sa nakuha mao ang kwartang P3,400 nga gituuhang halin sa iligal nga drogas, tulo ka medium size nga plastik nga may lama sa gidudahang shabu ug usa ka motorsiklo.
Ang mga suspetsado kasamtangan na karong gitanggong sa karsel sa kapolisan alang sa pagpasaka og kaso karong adlawa.