Estudyante 'todas

Gubat tali sa duha ka managribal nga mga fraternity miulbo pagbalik human usa ka estudyanteng giingong inactive nga miyembro sa Alpha Kappa Rho ang gipusil patay niadtong Lunes sa hapon diha sa luyong bahin sa usa ka dakong unibersidad ning dakbayan.

Usa ka bala gikan sa kalibre 9mm ang mitipi sa kinabuhi ni Janeel Anthony Espinosa,20, 3rd year sa kursong Bachelor of Science in Information Technology ug lumolupyo sa barangay Guadalupe ning dakbayan.

Base sa gihimong imbestigasyon ni SPO3 Zenaido Pastorfide sa Homicide Section ang biktima uban sa mga higalang sila si Earl Sarabosing ug Martem Tyrel Cui mangaon unta sa usa ka kan-anan diha sa luyong bahin sa Southwestern University sa dalan Aznar Road, Barangay Sambag Uno dihang mahitabo ang pagpamusil.

Usa ka wala mailhing lalaki ang gikatahong kalit miduol sa biktima kinsa kasamtangang nagpaabot sa iyang gi-order nga sud-an diha sa gawas sa way daghang pangutana gipusil makausa ka higayon sa ulo si Espinosa.

Human sa pagpusil daling midagan palayo ang gikatahapan samtang gidala ang biktima sa Sacred Heart Hospital apan nakabsan kini sa iyang kinabuhi.

Usa ka basiyo sa gituohang 9mm nga kalibre sa bala ang narekober sa kapolisan diha sa crime scene.

Nagduda ang kapolisan nga posibleng miyembro sa karibal nga fraternity sa Akhro nga Tau Gamma Phi ang responsable sa pagpamusil apan buot pa kini sutaon sa nagpadayong imbestigasyon.

Pipila pa ka bulan ang nakalabay duha ka tawo ang napagan diha sa gubot usab sa gituohang fraternity dili layo sa ganghaan sa maong tunghaan.

Ang Akrho ug ang Tau Gamma Phi duna nay ubay-ubay'ng sakop nga nagpinatyanay dinhi sa dakbayan sa dugay nang panahon diin pipila sa mga mapagan dili gani mga miyembro sa tagsa-tagsa nila ka grupo.