Lain journalist gipatay sa Gensan

Dili na gyud mapapas ang bansag sa Pilipinas nga "most dangerous place for journalists" human laing miyembro sa media ang gipusil patay sa walo ka mga tawong luwan sa upat ka motorsiklo didto sa General Santos City niadtong Domingo sa hapon samtang ang biktima padulong na unta pauli .

Kinse ka bala diha sa kalawasan ang nahiaguman ni Rolando "Dodong" Morales, 44, molupyo sa Polomoloc South Cotabato, block-timer sa Radyo Agong sa iyang programang "Tingog sa Barangay."

Gikatahong usa ka semana una pa ang pagpamanhig gikastigo sa biktima ang mga lokal nga opisyal sa mga kabarangayan sa dakbayan sa General Santos ug mipasangil nga "utok" sa salvaging ang maong mga opisyal.

Samtang lakip sa gisubay sa kapolisan mao ang giingong krusada ni Morales batok sa iligal nga drogas sa mga kabarangayan sanglit si Morales sakop man sa Barangay Anti Crime Task Force sa ilang lugar.

Giingong bag-uhay pa nahuman sa iyang programa ang biktima ug mosakay na unta sa iyang sakyanan dihang kalit nga miabot ang upat ka motorsiklong gisakyan sa mga tawo nga armado sa tag-as nga kalibre sa armas de fuego.

Nasutang unom ka bala ang mipusgay sa ulo sa biktima duha sa dughan ug lima sa likod ug uban pang parte sa lawas niini nga maoy nakaingon sa iyang kamatayon kinse ka minutos human madala sa tambalanan.

Si Morales maoy ika-unom nga journalist nga gipatay karong tuiga ug kusganong gikundenar sa National Union of Journalist of the Philippines (NUJP).

Ang Pilipinas ikaduha lamang sa Iraq (nga karon padayon pang naggubat) nga labing delikadong dapit alang sa mga journalist tungod sa pagpatay sa mga tigbalita.