Modernong parke sa Talisay kompleto na'g plano

Kini kon may desisyon na ang korte bahin sa expropriation proceedings nga gisang-at niini alang sa 7,000 metro kuwadradong luna nga nahimutang sa atubangan sa city hall building sa barangay Lawaan 2.

Nag-ungot na karon ang maong lakang diha sa hukmanan tungod sa pagdumili sa tulo ka tag-iya sa maong kayutaan sa tanyag sa kagamhanan sa Talisay nga bayran og tag P2,000 matag metro kuwadrado sama sa presyo sa yuta nga gitarokan sa city hall building.

Matud pa ni city administrator Aurora Econg nga ang gusto gyud sa mga tag-iya nga P4,500 gyud matag metro kuwadrado ang ibayad kanila sa kagamhanan.

Gisang-at sa korte ang maong kaso aron padesisyonan kini pinaagi sa expropriation proceedings, usa ka legal nga pamaagi nga mahimo sa gobyerno alang sa paggamit sa mga kabtangan ilabi na sa yuta nga gikinahanglan kaayo sa mga proyekto niini.

Kun matukod na ang maong plaza sa siyudad, si Econg nagkanayon nga hitupngan man ugaling kini apan dili na hilabwan sa mga parke nga makita dinhi sa nasud.

Ang katahom sa parke nga naa sa atubangan sa White House sa Washington D.C. haom usab kaayo sa kahimtang sa nahimutangan sa yuta nga anaa sa atubangan sa city hall sa Talisay.

Gani gawas sa katibuk-ang plano niini, daan na kining gisingit og gimontar sumala sa makita sa blue print nga plano sa gitukod nga edipisyo sa city hall nga mibalor og P121 milyones.

Hinoon si Econg milaom nga dili magdugay mopakanaog nag desisyon ang korte bahin sa maong yuta aron matukod na ang modernong parke diha sa Talisay City. q