Guardians, coastguard mibantay sa Talisay

Mipahigayon ug ayuda ngadto sa Talisay Life guards ang grupo sa New Guardian for Freedom and Democracy, Philippine Coast Guard Auxiliary ug Talisay Radio Amateur Group (TRAG) niadtong Domingo.

Si Konsehal Bernard Odilao, presidente sa New Guardian ug TRAG nagkanayon nga mitabang sila sa mga life guard sa pagbantay sa mga kabaybayonan sa dakbayan.

Usab sa pagtubag sa mga emerhensiya ilabi nga gyud nga miadtong Domingo puno kaayo ang mga baybayon sa dakbayan sa mga nangaligo tungod sa pagsaulog sa San Juan.

Niadtong Biyernes, ang kasaulogan sa Adlaw ni San Juan apan tungod kay atol man kini sa adlaw nga tingtrabaho gisaulog ang adlaw ni San Juan niadtong Domingo.

Matud pa ni Odilao nga tibuok adlaw sila nga nagmonitor sa kabaybayonan sa dakbayan diin boluntaryo sila nga mipahigayon sa ilang serbisyo.

Si Odilao midungag nga ang mga divers sa Philippine Coast Guard mihatag usab sa ilang ayuda ngadto kanila. Gawas sa pagmonitor sa mga nangaligo sa dagat ila usab nga gipaningkamutan nga mamentinar ang kahapsay ug kalinaw sa lugar.