Tikas sa 2004 election? 'Sulti ni Clavel insulto' - Ediegul

Si Kongresista Eduardo Gullas namahayag nga insulto sa mga Sugbuanon ang gihimong deklarasyon ni Kongresista Clavel Asas Martinez nga dunay nahitabong pagpanikas dinhi sa lalawigan sa Sugbo adtong milabay'ng piniliay diin ang pangulo nakakuha og kapin usa ka milyon nga boto.

"I made it of record in yesterdays (Miyerkules) public hearing in Congress that the sweeping statement of Hon. Clavel Martinez is an insult to all Cebuanos," kusganong pamahayag sa kongresista.

Giklaro ni Gullas didto sa maong public hearing isip representante sa unang distrito midaog gyud si Presidente Arroyo nga walay tikas ug sa patas nga paagi.

Matud pa ni Gullas sa walo ka distrito sa tibuok lalawigan sa Sugbo diin duha niini dinhi naa sa dakbayan sa Sugbo ang 1st district maoy ikaduha sa mihatag og labing taas nga boto alang kang Arroyo.

Samtang gisupak usab ni Gullas ang migula sa mantalaang The Philippine Star diin miingon si Rep.Martinez nga nakapaminaw na sa maong tape si Gullas, matud pa ni Gullas wala pa siya sukad nakapaminaw niini sukad sa iyang pag-abot niadtong milabay'ng Domingo gikan sa International Labor Convention didto sa Geneva isip representante sa Kongreso.

Didto sa nagpadayong public hearing kagahapon nahisgutan ang gidaghanon sa mga kopyang nagpasad sa kadalanan nga mapalit sa baratong presyo, dunay tag P5 samtang ang uban gihatag gani nga libre.

Sa gihimong ronda dili palang dugay sa National Bureau of Investigation sa kauluhan si Director Reynaldo Wycoco mitug-an nga dunay usa ka printing press nga ilang naronda nga may nakumpiskar nga mga posters kontra Arroyo nga nagkantidad og minilyon ka pesos.

Si Wycoco nagtuo nga timailhan kini kun itupad sa imbestigasyon sa Intelligence Service sa AFP (ISAFP) kabahin sa imbestigasyon sa destabilisasyong giplano sa mga grupong supak kang Arroyo, duna gyuy nagpaluyong dagkong tawo sa pag-produce og daghang kopya niini sanglit dili motuo si Wycoco nga makakuha og ingon niana kadakong pundo ang mga estudyante.