Si Gobernador Aumentado miingon nga nahibalo sila nga si Presidente Arroyo muduaw sa dakbayan sa Sugbo karong umaabot nga Miyerkules hinungdan nga gidapit nila kini nga mutambong sa dakong kalihukan ning dakbayan.
Matud pa ni Gobernador Aumentado nga ang prayer rally nga himoon ning dakbayan gitumong aron manawagan sa kalinaw ingon man ipadayon ang programa alang sa kalambuan.
Gipasabot sa gobernador nga tinguha nila nga ipakita ngadto ni Presidente Arroyo nga nagpaluyo sila sa tinguha sa administrasyon niini alang sa kalambuan sa nasud.
Gitataw hinoon ni Aumentado nga ang tanang mga pasangil batok kaniya angayan nga mapamatud-an ngadto sa legal nga pamaagi.
Si Aumentado midugang pag-ingon nga kon dili makatambong si Presidente Arroyo gidapit nila nga makatambong si Bise Presidente Noli De Castro og miyembro sa Kabinete sa presidente.
Tinguha sa gobernador nga mapaabot ang mensahe ngadto sa tibuok nasud nga sila nagpaluyo gihapon ni Presidente Arroyo.