Water refilling station ipa-inspection

CEBU, Philippines - Gimandoan ang konseho sa Siyudad sa Sugbo nga ipa-inspeksyon ang mga water refilling station, ingon man ang mga  water dispenser nga naa sa kilid sa mga karsada ipamutang.

Matud pa ni Konsehal Dizon nga gikinahanglan  kaayo  kini  aron maseguro ang kaluwasan sa mga Sugbuanon gikan  sa maong mga klase sa tubig ilabi na karon nga nagbaha na ang mga water refilling station ning dakbayan.

Nagkanayon si Dizon nga aduna siya’y nasuta nga mga pagtoon nga matud pa nga kapin sa 10 milyones ka  mga Pinoy ang wala’y igong tinubdan sa limpyo nga tubig.

Mao kini ang hinungdan nga nagkadaiyang sakit ang maangkon sa lawas sa tawo gumikan sa pag-inom og hugaw nga tubig.

Nanawagan usab ang konseho sa Food and Drug Administration (FDA) nga suportahan ang nag-ung-ong nga  House Bill 2606 nga nailhan usab isip "Safe Bottled Water Act” nga  maoy  mokontrolar   ug  mosuta  sa kahinlo sa mga botelya sa tubig  ug ang tubig  mismo nga isulod  niini.

Gimando sa maong balaodnon nga mohimo og higpit nga monitoring ang kagamhanan aron sa pagseguro nga luwas ang botelya nga gisudlan sa tubig partikular na ang kalidad niini.

Gisubli sa pagpahimangno  ni  Dizon ang mga nag-negosyo og tubig nga kinahanglan nga magsul-ob gayud og face mask sa panahon  nga anaa  na sila  sa proseso sa pagpanud  og tubig sa ilang mga gallon ug kinahanglan nga nakaplastar kanunay ang ilang mga permit sa ilang mga opisina.

Nasuta  sa  mga  pagtuon sa matag  balay  nga migamit  og kaugalingong  dispenser nga kundili mahinloan  o  mahugasan kausa sa matag semana  ang dispenser, maghitak ang lamog-lamog o  hugaw  nga  linugdang  sa tubig  sa sulod niini uban sa mga  pito-pito.

Busa ang mga  water  dispenser nga nanurok murag  uhong  sa kadaplinan  sa  mga karsada karon nga tagsa ka  tuig  nga  walay  hinlo-hinlo  sa  mga  tag-iya, mura  na  og lapok  sa imbornal  ang sulod  niini  ug  ang  mga  pito-pito  naghitak  na  usab  sa sulod  niini.

Kutob  sa  makainom  sa maong  mga pito-pito gituohan nga kun makapatambok  kini  sa tawo  maayo  apan kun makamugna og sakit mas maayo  nga  mao kini susihon  isip  homework sa mga konsehal  ning dakbayan   sa Sugbo. (/WC) (BANAT NEWS)