Ginebra, Converge nakatutok sa semis
MANILA, Philippines — Susubok ang Barangay Ginebra at Converge na maalpasan na ang San Miguel at Rain or Shine, ayon sa pagkakasunod, upang makamartsa na sa semifinals sa Game 4 ng PBA Season 50 Governors’ Cup quarterfinals series sa Smart Araneta Coliseum.
Unang tatangka ang Gin Kings ngayong alas-5:15 ng hapon kontra sa kapatid subalit mahigpit na Beermen kasunod ang parehong misyon ng FiberXers kontra sa Elasto Painters sa main game ng double-header sa alas-7:30 ng gabi.
Parehong may 2-1 kartada sa best-of-five series ang Ginebra at Converge.
Kinubra ng Gin Kings ang unang dalawang laban kontra sa Beermen ngunit yumukod sa Game 3, 101-98, habang taob sa Game 1 ang Converge bago angkinin ang huling dalawang laro.
May tsansa sana ang Gin Kings na makumpleto ang 3-0 sweep kahit natambakan ng hanggang 15 puntos kontra sa Beermen bago kapusin lang nang bahagya sa comeback nila tungo sa dikit na tatong puntos na kabiguan.
At ang balikas na iyon ang balak sakyang momentum ni head coach Tim Cone upang hindi na pahiritin ng winner-take-all Game 5 ang SMB.
“I’m proud of the way we played, I’m proud of the way we battled,” ani Cone ng Ginebra na tinamabakan ang SMB sa unang dalawang laro, 104-95, at 126-99.
“So, hopefully, we bring that same battle, but this time we can make some shots and handle the ball better, in Game 4.”
Sa kabilang banda, hawak ng FiberXers ang buong momentum matapos ang 124-120 kabiguan sa Game 1.
- Latest
