Duha ka street sweeper trucks gipalit sa siyudad sa Sugbo

CEBU, Philippines — Mipalit ang Kagamhanan sa Dakbayan sa Sugbo og duha ka bag-ong mechanized street sweeper trucks nga nagkantidad og ?24 milyon.

Gisusi ni Mayor Nestor Archival ang duha ka trak niadtong Oktubre 19, 2026, uban sila ni Konsehal Paul Labra ug bag-ong City Administrator Atty. Briccio Boholst.

Ang maong pagpalit kabahin sa paningkamot sa siyudad nga mahimong moderno ang mga programa sa sanitasyon ug pagpanalipod sa kinaiyahan.

Base sa mga dokumento sa procurement nga gipagawas sa Bids and Awards Committee, gigahin ang ?24 milyon alang sa duha ka trak human sa open competitive bidding nga gihimo niadtong Hunyo 2026, ubos sa New Government Procurement Act o Republic Act No. 12009.

Matud ni Archival, gamiton ang mga trak sa paglimpyo sa dagkong kadalanan sa tibuok siyudad matag kaadlawon kun diin hawan ang dalan aron mas paspas ang operasyon.

Bisan pa sa bag-ong kahimanan, gihangyo ni Archival ang mga Sugboanon nga likayan ang paglabay og basura bisan asa ug tabangan ang kagamhanan sa pagmintinar sa kalimpyo sa kadalanan.

Ang pag-angkon sa mga bag-ong trak nahitabo samtang nagpadayon ang dakbayan sa pag-atubang sa dugay nang problema kalabot sa pagdumala sa basura ug sanitasyon.

Gihimug-atan ni Archival nga ang pagpanglimpyo sa siyudad dili kinahanglan nga mag-agad sa mga kahimanan sa gobyerno apan gikinahanglan niini ang hiniusang responsibilidad sa tanang Sugboanon. — MEL BANAT NEWS