Gikan sa dula sa entablado Jay misulod sa pageant world

CEBU, Philippines — Lain na pud nga kasinatian sa entablado ang gisudlan sa 24 anyos nga theater actor  nga Filipino-Taiwanese nga si Jay Chan II isip usa sa mga kandidato sa  Mr. and Ms. Chinatown Global Philippines 2026.

Ang Mr. and Ms. Chinatown Global Philippines 2026 kay usa ka nationwide search alang sa sunod nga cultural ambassadors ug entertainment talents sa nasud kun diin 26 ka  official candidates  ang magtigi sa titulo karong Oktubre 20, 2026 sa Metropolitan Theater didto sa kaulohan . Si Chan kay usa ka events performer, aktibo  nga theater actor sa Sugbo, video editor, ug  content creator.

Sukad pa pagkabata, aktibo na si Chan sa performing arts. Gani, ang iyang ginikanan mao ang nagtukmod kaniya nga mopaubos og nagkadaiyang workshops sama sa pagkanta, pagpatukar og piano, martial arts, pagduwa og badminton ug pagsalmot og mga theater play.

Alang kang Chan, anad siya motungtong sa entablado isip theater performer. Apan giangkon niya nga bag-o alang kaniya ang kalibutan sa pageantry.

Sa dihang nasayran niya nga adunay ipahigayon nga audition ang Chinoy TV pinaagi sa pakipagtambayayong sa Star Hunt , namasin lang siya nga moapil apan wala siya magdahom ang iyang gisudlan mao ang usa ka pageant.

Gitug-an sab niya nga unang higayon niya nga molinya og audition alang sa usa ka national TV search.

Gisaysay sa Chinoy TV nga 2,000 ang misalmot sa audition gikan sa Manila, Baguio, Cebu ug Davao sa wala pa mapili ang 26 ka finalists.

Sa 11 ka mga lalaki, Si Chan lang ang nag-inusarang regional candidate gikan sa Cebu.

Samtang sa 15 ka babaye, 5 ang gikan sa Cebu nga gilangkuban nila ni Bianca Codilla, Daphne Holaysan, Cathy Yap, Emily Chiu, ug Jaden Narvios.  Dili lang katahom o pisikal nga presentasyon ang sentro sa kompetisyon. Gipahimug-atan  sa mga organizer nga ang MMCG PH kay  usa ka talent discovery ug development platform alang sa mga aspiring Chinoy kun diin makadawat kini og oportunidad sama sa acting, hosting, music, digital content ug uban pang entertainment projects.

Ang mga representante sa Cebu nanghinaot nga  makaangkon og suporta alang  sa People’s Choice Award ug matabangan si Chan nga makasiguro og puwesto sa TOP 6.

Adunay duha ka pamaagi sa pagbotar: Free Voting ug Paid Voting.

Sa Free Voting, kinahanglan nga mag-download og “1Zone” application. I-sign-up  ang  lehitimong e-mail address ug i-verify aron makalog-in. Sa Home Page, pilion ang “Mr. and Miss Chinatown Global Philippines 2026” ug molugwa ang mga hulagway sa 26 ka finalists   Pangitaon lang ang hulagway ni “Jay Chan” ug i-click ang “vote”.

Alang  sa paid voting, mahimong mobotar pinaagi sa https://mrmschinatownglobalphilippines.1voting.com ug mamahimo nga mopili kung pila ka votes .

Mamahimong mobotar matag adlaw sa dili pa magsira ang botasyon karong Oktubre 20, 2026 sa alas 6:00 sa gabii.

Sa pagpadayon sa kompetisyon, alang kang Chan, dili lang kini bahin sa paglangkat sa korona ug titulo apan ang maong plataporma nagsilbi nga usa ka higayon nga mogawas sa iyang comfort zone, mosuway og bag-ong butang ug gamiton ang iyang talento aron makahatag og inspirasyon sa uban.