Senior gipusil patay

CEBU, Philippines — Gipusil patay ang 60-anyos nga mag-uuma samtang nagsakay sa iyang motorsiklo sa Purok 3, Barangay Can-aga, Sibonga, Cebu, pasado alas-1 sa hapon niadtong Septiyembre 11, sumala sa Sibonga Municipal Police Station.

Giila ang biktima nga si Domingo Lopez Tañola, residente sa Purok 5, Barangay Can-aga.

Sumala sa inisyal nga imbestigasyon, padulong si Tañola sa Barangay Cantularoy aron motambong sa pista dihang gipusil siya sa wala pa mailhing gunman samtang nagsakay sa iyang motorsiklo.

Matud sa anak sa biktima nga si Victoria Tolomia Tañola, didto siya sa usa ka atabay daplin sa barangay road sa Purok 3 uban sa iyang lima-anyos nga anak dihang nakamatikod siya og duha ka lalaki nga nagsakay sa puti ug itom nga motorsiklo.

Giasoy ni Victoria nga ang driver ug back rider nagsul-ob og itom nga jacket, jeans ug itom nga eyeglasses.

Pipila ka segundo human sa ilang paglabay, nakadungog siya og buto sa armas dili layo sa ilang nahimutangan.

Pag-adto niya sa dapit, nakita niya ang iyang amahan nga naghigda sa tunga sa dalan tupad sa iyang motorsiklo ug adunay daghang samad pinusilan sa lain-laing bahin sa lawas.

Giingon sa pulisya nga namatay dayon ang biktima tungod sa mga samad nga iyang naangkon.

Nagpadayon ang follow-up investigation sa kapulisan aron mailhan ang mga suspek ug mahibal-an ang motibo sa pagpamusil. (BANAT NEWS)