Naglumbaanay, nakapatay
CEBU, Philippines — Patay ang 42-anyos nga lalaki human nabanggaan sa Toyota Vios samtang mitabok kini sa pedestrian lane sa Gov. M. Cuenco Avenue, Barangay Kasambagan, Cebu City, pasado alas-3 sa kaadlawon niadtong Biyernes, Septiyembre 11, 2026.
Giila sa kapolisan ang biktima nga si Ralph John Vir Salise, residente sa A.S. Fortuna St., Barangay Banilad, Mandaue City.
Matud sa kapolisan, mitabok si Salise sa dalan padulong sa pikas bahin niini dihang nabanggaan siya sa Toyota Vios nga may plakang GBK 1475, nga giingong gimaneho sa usa ka lalaki nga giila lamang sa alyas nga Billy Tabalason.
Tungod sa pagbangga, natumba si Salise ug gidala sa usa ka pribadong ospital, apan gideklarang patay, matod sa kapolisan. Sumala sa Traffic Enforcement Unit sa Cebu City Police Office, ang Vios ug Toyota Raize nga may plakang GAP 3673 padulong sa Talamban ug giingong naglumbaanay sa wala pa nabanggaan si Salise.
Ang Raize gimaneho ni 22-anyos nga si Ralph Sisco Acol ug may 17-anyos nga pasahero. Human mabanggaan si Salise, gibiyaan ni Tabalason ang Vios ug misakay sa Toyota Raize nga gimaneho ni Acol ug daling nangikyas palayo sa lugar.
Misulay og gukod ang drayber sa VinFast Green Taxi nga si Fritz Joshua Badana Peñaflor.
Apan giingong nabanggaan sa Raize ang Green Taxi ug mipadayon sa pagpadagan palayo. Wala nay laing naangol o namatay nga gitaho ang kapolisan gawas kang Salise.
Nadakpan si Acol ug gidala sa Traffic Enforcement Unit alang sa imbestigasyon. Matud sa kapolisan, positibo siya sa alcohol sa breathalyzer test. Padayon sab nga gipangita sa kapolisan si Tabalason. Giandam sa kapolisan ang mga kaso may kalabotan sa insidente, lakip ang reckless imprudence resulting in homicide ug uban pang mga kaso.— IBM BANAT NEWS
- Latest
