Manila’s finest, waging-wagi sa Hollywood!

Ipinagdiriwang ng Cignal TV, MQuest Ventures, at Spring Films ang tatlong malalaking tagumpay sa Hollywood.

Naging sentro nga ng atensyon sa Hollywood ang pelikulang Manila’s Finest —na prinodyus ng Cignal TV, MQuest Ventures, at Spring Films— matapos magwagi ng tatlong pangunahing parangal sa 2026 Manila International Film Festival sa Los Angeles.

Itinanghal ang pelikula bilang Best Picture, habang nanalo naman si Ashtine Olviga bilang Best Actress at tumanggap ng parangal para sa Best Cinematography ang direktor na si Raymond Red.

Tinanggap ni Red ang tatlong parangal para sa mga aktor at production team ng pelikula.

Itinatampok sa Manila’s Finest ang isang mahusay na grupo ng mga aktor sa pangunguna nina Piolo Pascual, Enrique Gil, Ashtine Olviga, Dylan Menor, Rica Peralejo, at marami pang iba sa mga pinakamahuhusay na aktor ng bansa.

Ang mga tagumpay na ito ay isa na namang pagmamalaki para sa pelikulang Pilipino, na nagpapakita ng husay sa pagkukuwento at ng world-class na talento sa likod ng pelikula.

Para sa Cignal TV, MQuest Ventures at Spring Films, lalo pang pinatitibay ng pagkilalang ito ang kanilang dedikasyon sa paglikha ng mga kuwentong Pilipino na tumatatak at humahaplos sa damdamin ng mga manonood, lokal man o sa buong mundo.