Unang halad sa pagtuo, malampuson

CEBU, Philippines —  Gibanabana nga mokabat sa 7,000 ka tawo ang mitambong sa unang Halad sa Pagtuo 2026 nga gipahigayon niadtong Sabado, Agosto 29, sa Cebu City Sports Center (CCSC).

Gideklarar ni Cebu Governor Pamela Baricuatro nga malampuson ang unang edisyon sa maong kalihokan, nga nagtigom sa pagtuo, kultura ug pagkamamugnaon sa mga Sugboanon.

“I'm so thankful and grateful. I'm happy and excited. It turned out really well,” matud ni Baricuatro human sa kalihokan.

Matud sa gobernador, nalipay siya sa gidaghanon sa mga tawo nga mitambong, ilabi na sa pagpakita sa 53 ka carroza gikan sa nagkadaiyang siyudad ug lungsod sa lalawigan.

“Everybody said that it was good to present all our carrozas,” matud pa niya.

Apan wala pa gikumpirma sa gobernador kung himoon ba kining kompetisyon sa sunod tuig. Matud niya, kinahanglan pa kining konsultahon uban sa mga mayor sa mga lungsod ug siyudad sa Cebu.

“We have to consult the mayors for that, because as you all know, we are a consultative administration,” matud ni Baricuatro.

Gipahayag usab niya nga posible nga ipadayon ang kasamtangang porma diin usa lamang ka carroza matag distrito ang moapil, kung ipadayon ang maong selebrasyon sa umaabot.

“Pero siguro we will keep it lang one per district,” dugang pa niya.

Gihatagan og gibug-aton ni Baricuatro ang dako nga turnout sa mga nanan-aw, diin makita usab ang presensya sa mga mayor, department heads ug mga empleyado sa Capitol.

“If you can see the turnout sa atong spectators, daghan kaayo,” matud sa gobernador. Apil mismo si Baricuatro sa prusisyon uban sa iyang anak nga si Public Health Consultant Dr. Nikki Catalan, diin ilang giubanan ang carroza ni Sta. Monica de Pinamungajan. Pareho silang gikan sa Pinamungajan.

Nagsugod ang prusisyon alas-2:30 sa hapon gikan sa Cebu Provincial Capitol padulong sa CCSC, nga adunay gilay-on nga 2.1 kilometros.  Ang 53 ka carroza nga nagrepresentar sa patron saints sa nagkadaiyang komunidad sa Cebu.

Nailhan usab ang mga carroza tungod sa ilang kaugalingong estilo sa dekorasyon. Ang Tudela, pananglitan, migamit og mga prutas sama sa oranges, pakwan, lubi ug cassava, dugang sa mga bulak, imbes nga kasagarang floral decorations lamang.

Sa laing bahin, gipakita sa Danao City ang pagkamamugnaon pinaagi sa carroza ni Santo Tomas de Villanueva, diin ang mga bulak gihimo gikan sa mga gigamit nang kutsara.

Human sa prusisyon, pormal nga gipresentar ang mga carroza sa CCSC ug gisundan kini sa Holy Mass, blessing sa mga carroza, mass dancing ug fireworks display. Gihatagan usab og libre nga pagkaon ang mga nanambong, lakip ang puso ug ngohiong.

Sa ikaduhang bahin sa programa nga nagsugod alas-6 sa gabii, gipakita usab ang pito ka Cebuano festivals—Sinulog sa Carmen, Tuba Festival of Borbon, Bisnok Festival of Dumanjug, La Torta Festival of Argao, Hinulawan Festival of Toledo City, Dagitab Festival of Naga City ug Kabkaban Festival of Carcar City.

Gikonsiderar ni Baricuatro ang Halad sa Pagtuo isip usa ka kalihokan nga nagtumong sa paghiusa sa lawom nga pagtuo ug buhing kultura sa mga Sugboanon. Sa pagtapos sa selebrasyon, nagpahigayon usab og performance si singer-songwriter Martin Nievera.

“Let's do this every year. A new festival is born in Cebu, Halad sa Pagtuo!” matud ni Baricuatro (BANAT NEWS)