PWS nihimakak sa pasangil ni Archival

CEBU, Philippines — Gihimakak sa Prime Integrated Waste Solutions, Inc. (PWS) ang pasangil ni Cebu City Mayor Nestor Archival, Sr. nga gidid-an o gibabagan nila ang siyudad nga makalabay og mga basura diha sa ilang pasilidad tungod kay adunay mga sakop oposisyon sa konseho ang nagpalangay sa pagproseso niini.

Atol sa executive session kagahapon, si PWS General Manager Niño Abellana, Jr. nihimakak sa pangangkon sa mayor nga nagdumili ang kompaniya sa pagdawat sa basura sa siyudad apan adunay mga konsehal nga sakop sa oposisyon ang nakababag sa pagdawat sa landfill sa mga basura sa siyudad.

Niadtong Hulyo 27, 2026, gibutyag ni Archival nga makadaghang higayon na’ng nananghid ang siyudad aron makabalik sa paglabay og basura sa Barangay Binaliw human kini makadawat og partial lifting sa cease-and-desist order gikan sa Department of Environment and Natural Resources-Environmental Management Bureau (DENR-EMB)-7 ug business permit gikan sa Business Permit and Licensing Office (BPLO).

Matud sa mayor nga nagdumili gihapon ang operator sa landfill sa pagdawat sa basura sa siyudad ug napugos kini nga mopadayon og paglabay ngadto sa Lungsod sa Aloguinsan.

Si Abellana nagkanayon nga wala pa sila modawat og basura gikan sa mga lokal nga kagamhanan tungod kay naghuwat pa sila sa full lifting order gikan sa EMB.

Sa pagkakaron, limitado pa sa mga pribadong haulers ang ilang gidawat nga basura nga mokabat sa 10 hangtud sa 15 ka tonelada matag adlaw.

Gipasabot ni Abellana nga ang kasamtangang interim cell sa landfill adunay kapasidad nga 20,000 metric tons nga maoy gitugotan sa partial lifting order.

Samtang gihuman pa ang mas dako nga main cell nga adunay kapasidad nga 200,000 metric tons, gipili sa kompaniya nga unahon sa pagserbisyo ang mga pribadong kompaniya.

Gipadayag ni Abellana nga wala sila’y gipaboran karon tungod kay gusto lang nila nga masiguro ang kapasidad ug kaluwasan sa operasyon sa dili pa modawat og dinagkoay nga tonelada sa basura gikan sa LGU.

Gibutyag usab ni Abellana nga niapil ang PWS sa unang bidding sa siyudad alang sa waste disposal services niadtong Mayo 2026 apan na-disqualify kini tungod kay nagkuwang kini sa pipila ka dokumento nga wala ma-upload sa PhilGEPS.

Ug tungod niini, wala sila makadaog bisan pa nga sila lang ang bugtong bidder.

Sa nisunod nga mga bidding, nipili ang kompaniya nga dili na moapil ug maghuwat na lang sa pagkuha sa full lifting order aron malikayan ang posibilidad nga ma-disqualify pag-usab.

Si Abellana niklaro nga walay labot ang konseho sa ilang wala pa pagdawat sa basura hangtud karon tungod kay igo lang nisunod ang PWS sa mga resikitos nga gikinahanglan sa EMB. (BANAT NEWS)