Na-sandwich sa trak

CEBU, Philippines — Patay ang usa ka 72-anyos nga babaye human natanggong ug napiit taliwala sa usa ka Isuzu Forward truck ug laing nakaparadang sakyanan diha sa Plaridel Street, Carbon, Barangay Ermita, Dakbayan sa Sugbo niadtong Huwebes sa hapon, Agosto 6.

Ang biktima giila sa kapolisan nga si Emma Erbito, residente sa Dakbayan sa Toledo. Base sa inisyal nga imbestigasyon sa Traffic Enforcement Unit (TEU) sa Cebu City Police Office (CCPO), nakaparada ang Isuzu Forward apan nag-andar ang makina niini samtang nagdiskarga og mga utanon ang mga trabahante.

Matud pa sa kapolisan, misulod si alyas “John” nga truck helper sa driver’s side sa trak ug aksidenteng nasabod niya ang gear shift hinungdan nga niabante ang trak ug naipit ang biktima nga wala nay kadaganan kay na-sanbdwich siya sa nakaparadang sakyanan.

Ang babaye gidala dayon sa Cebu City Medical Center apan gideklarang dead on arrival sa mga doktor. Gidakop sa kapolisan ang truck helper ug gipasakaan og kasong reckless imprudence resulting in homicide.

Sumala ni Traffic Enforcement Unit chief Police Lieutenant Colonel Jomar Medil, malikayan unta ang maong insidente kun nasiguro nga na-engage ang hand brake sa trak sa wala pa kini biyai sa drayber.

Gihangyo sad nila ang Land Transportation Office (LTO) Region 7 nga mag-isyu og show cause order batok sa rehistradong tag-iya sa maong trak ug suspendihon ang rehistro niini samtang padayon ang imbestigasyon sa insidente.—  IBM BANAT NEWS